Poesie - Santa Marina Filandari

Cerca
Vai ai contenuti

Menu principale:

Poesie

U  MASTRU CUSTURERI

Nta lu paisi miu scumpariru li mesteri,
minu mali ca restau ancora lu varveri!,
e io mi ricordu cu piaciri,
a mastru Micu chi facia u custureri.

Abitava  'ntà nu bassu ,e cincu figghj avìa,
a mugghjeri sempri arraggiata la vidia,
"vagabundu e mbriacuni si dicìa,
cà nu morzu i pani pà li figghj non l'avìa.

Mastru Micu pà nommu la sentìa parrari sindi jia
u si mbivi nu biccheri i vinu all'osteria,
anche pecchì pocu lavuru avìa,
e pemmu si caccia a fami chi tenia.

U lavuru na vota all'annu arrivava,
nu misi prima da festa du paisi cuminciava,
e la fonti era du soi guadagnu,
quandu  cusia li cauzi i fustagnu.

Lu fustagnu era na tila resistenti, e abbastava,
pa tuttu l'annu u s'indossava,
era assai difficili u si sciancava,
e non valia a pena u si stirava.

E quandu i lavurari si mentia,
cu sapi quanti gugghj  cunsumava,
e sempri arraggiatu jestimava,
ca li ruppia sempri mentri cusia

Na para i vestiti l'annu  li cusiva,
a Don Gatanu u gnuri du paisi,
pa tri tumana i ranu e na cannata d'ogghju si addubbava,
a la fini du lavuri pà li spisi.

Nu jiornu patruma si dissi a la mugghjeri,
porta lu figghju da mastru Micu u custureri,
'ntò stipu pigghja na giacchetta e nu pantaloni,
u si faci lu vestitu da prima comunioni.

Quandu arrivammu a la putiga i mastru Micu.
Era cu l'occhj russi e menzu mbriacu,
si misi u pigghja i misuri cu lu spacu,
e disssi ca la stoffa si pari troppu pocu.

Mama, si dissi:Chi faciti!,
nu metru pà misura non l'aviti?,
si rispundiu:cummari Tina non v'ammareggiati!,
can u mastru bonu,cu metru e senza metru,
li cusi boni li vestiti;
ca quandu si lu metti u vostru bambinu,
à di pariri nu grandi signurinu.

Arrivatu lu jornu di la prova u faci,
lu vestitu mi paria cà nò mi vaci,
na  manica longa e una curta fici,
e mama si dissi:Mastru Micu!
La giacca non si accuppa lu vjicu.

Cummari Tina non ci pensati,
cà mò cu dui sforbiciati,
a na fujenda sugnu riparati,
ca nò si vidi nenti, non vi preoccupati.

Finiu ca lu vestitu mi lu misi,
passiavu cuntentu 'ntò paisi,
ca mama mi l'aggiusta ci pensau,
pemmu cusi tutta a notti e per pocu no annorbau.

Autore (Francescantonio Restuccia).

 

LU VENNARI DI MARZU

Lu vennari di amarzu è dolerusu,
nuastru Signuri a la cruci hù misu.

Ca dui chjiova a li mani e natru jusu,
lu latu apiartu e lu costatu offesu.

Ma cui vi ciàngia a vui Patri omorosu
sù li peccati mia chi v'hannu offesu.

Supa a nnu munti levàru tri cruci
hìcia la muarti ammianzu e di dui latri.

Sua mamma 'nci hacìa lu piantu duci
hacìa ciangiri li piatri adurati.

Oh Higghjiu e dimmi e ccui ti dau ssa cruci,
supa si santi spaji delicati.

Mi l'ave datu lu cane Giudeu,
chjiu supa di mia chi 'nda pretende.

Higghjiu hammi na grazia e scinditinde
ca ccà c'è la tua mamma che ti prende.

Mamma tu benedimmi e vavattinde
di chistu cuarpu mio cui 'nda pretende.

Ti benedicu ssi mani e ssi pede,
ti benedicu tuttu oh gioia miu.

Ti benedicu ssi fasci e ssi panni,
quantu gucci di latti io t'ezze a ttia.


Dal Libro I SETTE ALLEGRIZZI
di Giuseppe Parrucci

A SAN GIUSEPPE

Dio ti salvi oh Giusiappi sposo della Divina
Maria nostra Regina universale.

O Santu senza uguale o gran Mistero eletto
hai visto a Dio suggetto ai cenni tuoi.

O quantu in cial tu pua Santu amabil caru
e di lu chjiesolariu unico e solo.

Arma di lu tuo vualu, grazia di lume eternu
siccurra al tuo Paterno amante sieno.

Tu di pietà si pieno e chi pietà 'mparasti
a Gesù chi allevasti e a Maria.

Tu hùsti all'agonia e hai visto a Dio prisente
e la Matre assistente al tuo conforto.

Ti prego stai accorto all'ultimo mio voto
assisti il tuo divoto all'ura estrema.

E stu miocuari trema del tentator malignu,
e tu accorri benignu e lu discacci.

E stu mio spiritu abbracci dai requie e dai riposo
e del regno glorioso ascende il vuolo.

E pue lu 'mbiatu vuolo gode la compagnia
di Gesù e di Giusiappi, e di Maria.




Dal Libro I SETTE ALLEGRIZZI
di Giuseppe Parrucci

PEPPINU 'U MONACU

'Nt' 'o paisi è 'u primu chi si leva.
'A genti 'u senti 'i 'nt' 'o lettu
chi raha chidi scarpi
strati strati.
Ogni tantu si ferma a ncunu muru
e spara 'na battaru
u s'appicica a sicaretta.
Quandu arriva e' scaluna d' 'a Chiesia
'a stuta e s'a menti 'nt' 'a baruccia:
ma non dura assai dà intra,
cà doppu chi sona i campani
'a torna a' piccicari.
'Nt' 'o jornu
è 'n giru cu' ncuna carriola
o cu' 'na bunbula i gas:
faci sti servizzi a cu' s'i cerca,
ma non pretendi nenti,
s'accuntenta 'i 'nu biccheri 'i vinu.
Quandu non avi 'i chi fari,
s'appoja o' portuni i donna Norina,
'na vecchiareda chi staci sula
e ogni tantu 'u manda a ncuna vanda.
Non parra bonu;
e arridi quandu ncunu
si sforza m' 'u capisci.
Peppinu 'u monacu,
penzu ca nescisti sacristanu.
Peppinu 'u monacu,
ti vogghiu beni,
pacchi non t' 'a pigghi cu' nudu.

di Franco Pagnotta

'A MISSA IN LATINU

'Na matina 'i dominica
trasivi 'nt' 'a Cattedrali
u mi sentu 'a missa.
--Staju 'nu pocu e poi mi ndi nesciu--
penzai prima u trasu.
Avi 'nu pocu 'i tempu
chi non sopportu i cosi longhi.
Ma ampena l'apriva 'a porta,
tornavi arretu 'i vint'anni:
'a musica i l'organu
accumpagnava 'u cantu d' 'u Kirieleison;
'na vuci bassa e potenti
chi non si sapia 'i dduvi venia.
'A missa era in Latinu.
Steppi 'nu pocu all'impedi,
poi jvi u m'assettu o' vancu.
-- Staju 'nu pocu e poi mi ndi nesciu--
avia penzatu prima u trasu.
Non mi ndi nescivi 'i dà intra
finnu a chi no' ntisi << Ite missa est >>.

di Franco Pagnotta

'U NATALI D''U ZI' JENNARU

'U zi' jennaru non l'avi 'u calendariu.
Puru ca l'avia a chi nci servia?
Non vidi quasi nenti…
Pa' idu non esistunu i stagiuni:
quando faci friddu è mbernu
e quando faci caddu è stati.
Mancu stamatina
Sapi chi jornu è.
Si leva o' solitu orariu
E s'assetta subba a chida seggia
Cchiù vecchia d'idu.
A menziornu
'na fimmana s'i porta 'na vuccata
e 'nu turruni.
Allura capisci ch'è Natali,
ma non dici nenti.
Non dici nenti 'u zi' Jennaru.
Ciangi

di Franco Pagnotta

I NUCIDI

Quandu i cotrari
avenu i barucci chini 'i nucidi
e i strati parenu pigghiati d'i bumbi
-- tanti eranu i fossedi --
allura volia diri
ca s'avvicinava Natali.
Tutti jocavam e' nucidi:
randi e picciotti.
Ndi raghavamu dà 'n terra.
pigghiavamu 'a mira
e tiravamu 'u fadu,
'a nucida cchiù grossa,
chida nchiumbata,
chi quandu si spaccava
si spaccava puru 'nu morzo 'i cori.
Era chissu 'u jocu 'i Natali.
Non c'era, 'a televisioni,
non avemu 'na lira 'nt''e sacchi:
'a ricchezza nostra
era chidu pugnu i nucidi
chi cuntavamu ogni sira,
comu 'u pecuraru cunta i pecuri.

di Franco Pagnotta


A tutti coloro che tra queste righe troveranno un ricordo, un'emozione.

 
Torna ai contenuti | Torna al menu